Aizawl: Mizoram cham mek, The Salvation Army hotu lu, General Brian Peddle hoin nimin khan The Salvation Army Officer Council neih a ni.
Aizawl Temple Corps biak ina officer council neih hi hun hniha then niin, chawhma inkhawmah Colonel Lalhlimpuii, TPWM-in inkhawm a kaihruai a, Commissioner Rosalie Peddle, WPWM-in thuchah a sawi.
Chawhnu hun Colonel Lalhmingliana, Territorial Commander kaihhruaiah hian General Peddle-a’n thuchah sawiin, “Salvation Army hi khawvela harsatna hrang hrang lo thleng atan Pathianin a lo buatsaih a, khawvelin Covid-19 avanga harsatna a tawh karah pawh Salvation Army chuan a thawk zel a ni,” a ti.
Officer kalkhawmte hnenah General Peddle chuan, “Rawngbawltu chu tawngtai mi ni a, Pathianin a hun taka a hman theih nih a pawimawh a ni,” a ti bawk.
Officer kalkhawmte atangin malzai te, zaipawl te ngaihthlak niin, general-in hun tawpah zahngaihna dawhkan hawngin officer hoten inhlan tharna an nei a ni.