Aizawl: Mizoram Pradesh Youth Congress Committee (MPYCC) chuan cheng vaibelchhe tel senna, Lengte leh Saitlaw rama mau chi chinna hmun an tlawh a, raw chinna chu hlawhchham lailet derah an puh.
MPYCC Information & Publicity Deptt-in nimin khan MNF returnee-tena mau tiak an phunna hmun an tlawh hnua thuchhuah an siamah chanchinthara an lo puanzar tawh ang leh an insawi angin heng lai hmuna mau puitling hmuh tur a awm miah lo a, cheng vaibelchhe tel senna mau chi tha mi chin project chu a hlawhchham lailet der a, a thlawna sorkar sum luan ralna a nih thu an sawi.
MPYCC hian RTC Act hmanga an zawhna, horticulture department-in an chhan danin mau/raw tiak chi thum phuntir a ni a. Kum 2020 atangin lo neitute hnenah mau/raw tiak 8,49,425 an sem tawh a, raw tiak leina atan Rs. vbc. 6.48 an sen tawh bakah link road laihna atan sum eng emaw zat sen a ni chungin, mau puitling tha pakhatmah an siamna hmuna hmuh tur a awm lo chu mak an tih thu an sawi.