Argentina midfielder Enzo Fernandez chu hun engemaw chen chhung ngawrh taka an ngaihven hnuah Chelsea an hlawhtling a. British football chanchin a player manto ber ni turin a lakluhna tur an ti fel.
Chelsea hian Pound maktaduai 107 an seng dawn a. Manchester City in kum 2021 a Jack Grealish lalut tura Pound maktaduai 100 an sen chu a khum.
Nikum August thla a Pound maktaduai 10 a Benfica zawmtu Fernandez hi tun season-ah a invawrh chak hle a. Club tana a chetthat hnuah Qatar a World Cup khelh zawh takah khan Young Player of the Tournament a thlan a ni.
Kum 22 mi hian Stamford Bridge-ah kum riat leh a chanve contract a ziak a. Chelsea in January thla a pawisa an hman chu Pound maktaduai 288 vel bawrah a chho.
Chelsea hian January thla a player pariat an lakluhna a ni a. Noni Madueke, Mykhailo Mudryk, David Datro Fofana, Andrey Santos, Benoit Badiashile te lalut nghetin Malo Gusto an lakluh hnuah loan in an chhuahtir nghal a. Atletico Madrid atangin Joao Felix chu loan in an hawh tawh bawk.
Blues hian club neitupa Todd Boehly hnuaiah player 17 lakluh nan Pound maktaduai 550 an hmang tawh tihna a ni a. Fernandez hi khawvela player manto ber a ni bawk.
Benfica tan vawi 29 inkhel hmanin goal li a khung tawh a. Portuguese club hian an leina club River Plate hnenah a man atanga 25% chu a kal tur thu an sawi tel.
Hetihlai hian UEFA danah Chelsea hian tun season-ah UEFA Champions League khel thei turin an player lakluh tharte zingah pathum chiah an ziak lut thei dawn a. February 15 hian Borussia Dortmund nen round of 16 first leg an khel ang.