US President Joe Biden chuan nipui lo thaw turah Prime Minister Narendra Modi chu an ram tlawh turin a sawm niin news agency PTI chuan a tar lang.
Sawmna hi a thuphung chuan pawm a ni a; mahse, ram pahnihte hian a hun leh ni tichiang tura indawr hmabak an la nei nual thung nia sawi a ni a. Tun dinhmunah chuan zin tumna hi ‘aw inpawhsakna’ satliah ang vel chauh a la ni rih.
India hian kuminah hian ram intawh khawm lian tak a thleng dawn a, heng zingah hian G-20 kaihhnawih summit pawh September-ah a thleng dawn a, hetah hian Biden-a pawh a tel dawn.
Ram pahnihte hian Modi-a zin hun atan hian June leh July bawr, US House of Representatives leh Senate an thut loh ve ve lai an tinzawn deuh va; mahse, prime minister hian ram chhung leh ram pawnah tih tur tam tak a neih sa avangin a thei kher dawn em a hriat rih loh.
Modi-a’n Washington a tlawh tur hian ni eng emaw zat a awh a ngai dawn a, US Congress in hnih member-te hmaa thu sawi leh White House-a state dinner buatsaihsak pawh a tel a ngai.
G-20 summit bakah hian Prime Minister Modi-a hian favang thleng sorkar thila ram chhung leh pawn lamah hun hmanna tur ruahmanna sa a nei tawh a, hei bakah hian state eng emaw zatah assembly inthlan a awm dawn avangin an party tana campaign-a hun hmanna tur a nei bawk.
Thuneitu sang pakhat, a hming tar lan rem lo chuan tuna thil sawi vek theih a la nih loh thu a sawi a. Engtikah nge Biden-a hnen atang hian sawmna dawn a nih leh tuten nge Prime Minister’s Office-ah hian lo dawng tih pawh sawi theih a ni lo tih a sawi.
Biden-a hian nikum December khan French President Emanual Macron chu a vawi khat nan state dinner a lo buatsaihsak tawh.
Hetih lai hian US sorkara mi pawimawh tak pakhat chuan Biden-a hian khawvel ei leh bar dinhmuna nghawng lian tak nei ram pahnih, India leh US inkungkaihna hian khawvel puma harsatna awmte a cho let thei dawn nia a ngaih thu a sawi tih thuthar lakhawmtute a hrilh.
“President Biden-a thlirnaah chuan ram pahnihte inkungkaih hi mamawh a ni a. Khawvelin thil a hmachhawn mek chi hrang hrang – ei tur, energy leh hriselna lam thil, sik leh sa, zalen taka Indo-Pacific a awm theihna tur zawng zawng hi US-India thawhhona tel lo chuan a kim thei lo niin a ngai,” tiin Indian chanchinbumite hnenah a sawi.
Prime Minister Modi-a pawh hian nikum khan Tokyo-ah US-India inkungkaihna, inrintawnna leh chu khawvel muanna leh ngialnghehna atan a tul thu a lo sawi ve tawh bawk.