India-in a awp chin Kashmir-a sipaiten hel pawla mi pathum an kah hlum hnuah Pulwama district-a khaw pakhatah chuan India duh lohna leh dona lam hawi nasa taka lantir a ni tih police leh khuaa chengten an sawi.
Inkahna hi Zirtawpnia Pulwama district chhim lam, Kakpora khuaa thleng niin hel an awm tih an hriat hnuah police leh sipai tanghoten beihpui an thlaknaah a nih thu Inspector General Vijay Kumar chuan a sawi.
Kumar chuan hel an kah hlum pathum zinga pahnih hi chu a hma ni chiah, Ningania Srinagar khawpuia India-a rorel lai, BJP hruaitu chenna in vengtu police kaptu zinga mi an nih thu a sawi.
An ruang bulah hian rifle pahnih leh pistol an chhar a. Ralthuamte hi a hma nia police an kah hlum kut atanga an lak a ni tih an finfiah tawh.
Inkahna thlenna khuaa chengte chuan venhim hna thawktuten Kashmir vela beihpui an thlaka an tih fo thin angin civil mi chenna chu bomb hmangin an vawm niin an sawi.
Inkahna a thlen hnuah hian mi za chuang zet chu a thlenna bulah hian pung khawmin India sorkarin an awmna vel a awp tawp an duhzia an aupui a. Police-te pawhin shotgun mu ruak leh mittui tlakna hlovin lunga anmahni vawmtute chu an bei let.
An innawrna velah hian civil mi pali vel an thi a, an zinga hmeichhe pakhat chu a ke-ah kah fuh a ni.
Kumar erawh chuan hmeichhia hi helho nena inkah laia kah fuh palh a ni zawk niin a sawi.
Kashmir hi India leh Pakistan ramten an intawm a, a pum hian an ram ve veah an chhal a. Muslim Kashmiri tam tak hian an awmna ram bial inpumkhat nan emaw, Pakistan hnuaia an awm theih nan helho hi an thlawp thin.
Indian thuneitute chuan Kashmir helhi hi Pakistan-in a pui thin niin an puh a. Pakistan erawh chuan a pha nasa hle thung.