Indian chanchinbumi, Siddique Kappan chu pawngsualna thleng nia sawi chungchang enfiah tura a kal an man chu kum hnih zet lung ina tantir a nih hnuah Ningani khan chhuah a ni ta.
October, 2020 khan Uttar Pradesh-ah Dalit tleirawl, an hnam aia hnam sang mipa paliin an pawngsual hnuah a thi nia sawi enfiah tura a kal chu man a ni.
He thil hian India ram pum luahin duh lohna pawh nasa taka lantir a ni.
Police chuan Kappan-a hian dan leh thupek kenkawhna tihbuaia tharum thawhna thlentir turin ruahmanna a siam niin an puh a, amah erawh chuan a pha.
A ruala car-a a chuanpui mipa dang pathumte pawh an puhna ang chiah hi puh an ni ve bawk.
Kappan-a lakah hian thubuai pahnih ziah luh a ni a, pakhat zawkah hian September thla khan Supreme Court-in bail phahna a pe a. Allahabad High Court-in a thubuai pakhat zawka bail phalna pawh December khan a pe zui leh a ni.
Court thutlukna anga chhuah tak tak turna tur erawh tihkhawtlai niin thla khat chuang hnuah a chhuak thei ta chauh a ni.
Ningania Lucknow khawpuia a tanna atanga a chhuah hnuah Kappan chuan a laka thubuai an siamte chu a bei let zel dawn tih a sawi.
“Chanchinbu-ah ka la tel chhunzawm zel dawn a, ka thu mai mai dawn lo. Chanchinbumi ka ni a, khawiah nge ka kal chuan ang?” tiin BBC Hindi hnenah a sawi.
Kappan-a hi Kerala mi a ni a, man a nih lai hian Malayalam tawnga tihchhuah, news portal Azhimukham-ah thawk thinin Hathras district, Uttar Pradesh a pan laia man a ni.
Man a nih hnuah hian police chuan a taksa leh rilru lam an khawihsak nasa niin a sawi a. A chhungte pawhin zunthlum a neih avanga damdawi pek an tum pawh phalsak an ni ngai lo niin an sawi.
Police erawh chuan hengte hi an pha thung.
Kappan-a leh a thuihhruaite hi Kerala-a hmunpui nei Muslim kal firfiak pawl, Popular Front of India (PFI) member an nih thu an sawi a. An pawl hi firfiak pawl nen inzawmna an neih avangin nikum khan an awm khapsak a ni nghe nghe.
PFI, Kappan-a dan hre mi leh Kerala-a journalist union chuan he thil hi an pha thung.
Kappan-a dan hre mi chuan kum 2021 daih tawhah khan court-a a dinsaka chu ‘bail theih loh thubuai tenau tete’ hmanga phuarh a nih thu BBC a lo hrilh tawh.
He thil a sawi hnu ni hnih lekah police chuan thubuai siamsak belhin ram phiara puhin anti-terror law khauh tak hmangin puhna an siam a, hei hi bail theih loh thawthang a ni.
February, 2021 khan sum leh pai buaina chhuitu, Enforcement Directorate chuan Prevention of Money Laundering Act tlawhchhanin thubuai an siamsak zui a. PFI atangin Kappan hian ‘buaina siamna tur’ sum a dawng niin an puh.