Aizawl: Chapchar Kut Organising Committee chu Chief Minister Zoramthanga hoin an thukhawm a, he hunah hian G20 hnuaia B20 meeting-a lokal palaite chu Chapchar Kut an chhim ve theih dan tur an rel.
CM Office Conference Hall-a thutkhawmah hian, B20 meeting neih dan tur leh palaite awm dan tur te, sorkar inpuahchahna leh hmabak la awm te, Chapchar Kut lawm dan tur programme committee ten ruahmanna an lo siam tawh te, G20 palaite leh state pawna miten Mizo hnam zia an tem ve theih ngeina turin Chapchar Kut hman dan tur ruahmanna lo siam tawhte chu thlirho niin, ruahmanna lo awm sa tihdanglam ngaite an siam danglam a ni.
Heng mikhualte avanga sum sen belh tur mamawh chu estimate siamin, a remchan anga sorkar laipuia dil ni se an ti bawk.
March 2, 2023 khian Aizawla G20 hnuaia committee pakhat B20 meeting neih a ni dawn a. Ram hrang hrang atanga he meeting avanga rawn kal tur te chu March 1-ah lo thlengin, March 3-ah let leh tur an ni a. Chapchar Kut Organizing Committee chuan heng palai te hi Kut chhim ve tura sawm ve ni se tiin a lo rel tawh a, G20 meeting organizer lam pawhin palaiten Mizo kut lian ber an telpui chu tha an ti a. Chumi bawhzuiin nimin khan chief minister hoin Chapchar Kut Organizing Committee OB leh G20 Mizoram Core Committee te an thukhawm a ni.
Nimin meeting a core committee hi Chief Coordinator Mizoram Dr. Renu Sharma, Chief Secretary a ni.