Aizawl : Guwahati-a tun hnaia neih zawh tak Beardo Mega Mister North East thlanna pakhatna C Lalpekhlua lawmna pualin nimin khan Aizawl Press Club-ah chanchinbumite nen hun hman a ni.
He hunah thu sawiin C Lalpekhlua hian, hlawhtlinna a chan theihna tur atana amah puitu Mizoram mipuite chungah lawmthu a sawi a. Tun dinhmun a thlen theihna atan hian Pathian leh Mizo mipuite an nih thu leh, amah kaihruaia buaipuitu zawng zawngte thlawpna a hmuh that vang a nih thu a sawi a. Mizo te hi mahni inrintawkna leh teirei peihna an neih chuan kawng engkimah hlawhtlinnain a um thei dawn tih a sawi.
C. Lalpekhlua hi C. Remtluanga leh Lahlimpuii te tupa niin, Aizawl Venghnuai a cheng a ni a, tunah hian PUC College-ah Education 6th semester zirlai a ni.
Mega Entertainment Organization hi Abhijit Singha din a ni a. Tunah hian Mega Mister NE hi vawi 12 thlanna niin, Mizo tlangval C. Lalpekhlua hi kum 2022 atan hian Mizoram atanga NE Mega Mister hmasa ber atana thlan a ni.
Sunsilk Mega Miss NE hi vawi 19 lai neih tawh niin, kumin atan hian Mizoram atangin Mizo nula te pahnih Isha Vanlalhriatrengi, Tuvamit leh Zorinsangi, Chhinga veng pawh finalist zingah an tel pha a ni.
N.E Mega Mr/Miss/ International (India) hi Mega Entertainment kaltlang a neih thin a ni a. Kumin 2023 hian Mega Mr NE bik hi Beardo Company senso a buatsaih a ni a. Sunsilk Mega Miss a Top 3 thlan chhuah te Crown hi Caratlane Company-in a sponsor bawk.
He contest neihna ah hian Mizoram atangin a vawi khatna atan Ms Partei Colney chu he contest pahnihah hian judge atan ruat niin, Amos MS Dawngzuala hi Mega Entertainment crew member a ni.