French champion Paris Saint-Germain in tunhnaia chetsual an neih leh thin hnuah hnehna an chang ve leh a. 3-1 in Montpellier lakah chak mahse an lawm erawh a kim vek lo.
Nilaini zana Stade de la Mosson a Ligue 1 inkhelah hian PSG in first half-ah star player Kylian Mbappe chu inhliam avangin an chan.
Second half tan atanga minute 10 a liamin Spanish midfielder Fabian Ruiz chuan PSG goal hmahruai hi a khung a. Lionel Messi chuan minute 72-naah an goal hnihna a khung.
Paris St-Germain hian season chawhma lam khan vung taka kalin an dinhmun sawhnghet hman viau mahse tunhnaiah point an hloh leh thin avangin anmahni umtu team te nen an inkar zau thin chu a zim lam zawngin a kal.
First half-ah PSG in minute sarihnaah penalty an hmu a. Mbappe -a’n pet in Benjamin Lecomte chuan a dansak a. Pet nawn tir leh a nih pawhin a dansak leh tho. Minute 21-naah hliam avangin France striker lakchhuah a ngai bawk.
Arnaud Nordin chuan Montpellier tan huntawp dawnah goal khat a khung a, mahse kum 16 leh ni 330 a upa defensive midfielder Warren Zaire-Emery chuan PSG chanchin a goal khung thei naupang ber ni turin huntawp dawnah an goal thumna a khung.