Mahindra Maxx Pikup Mizoram Open Boxing Championship-ah boxer 103 telin, zanin hian ropui taka khar an tum.
Thawhlehni zan khan Serchhip Boxing Hall-ah Sports Minister Robert Romawia Royte chuan a hawng a, mipa weight hrang 10-ah Mizoram hmun hrang hrang atangin boxer 90 an tel a, hmeichhia weight hrang pasarih awm tura ruahman a nih laiin pangaah mi 13 an tel.
Kg 60 chung lama tel tumin Asian silver medal latu Lalbuatsaihi a inbuk a, a khelhna tur weight-ah mi dang an awm loh avangin a inlan thei ta lo.
Ningani zanah weight hrang pasarih – hmeichhia pin, lightfly, fly leh bantam bakah mipa lightwelter, welter leh lightheavy final zawh fel a ni.
Zanin dar 8-ah kharna inkhawm hman a ni dawn a, weight hrang pariat – hmeichhia pathum leh mipa pangaah final khel a ni ang.
Serchhip District Boxing Association chuan 42nd Assam Rifles thawhpuiin Boxing Hall-ah boxer 88 thlengin, ei leh in an tumsak vek a; naupang leh weight zang lam tel lova boxer 100 chuang an inlan thei chu an beisei phak bak a nih thu an sawi.
Assam Rifles lamin boxer tha bik an chhinchhiah a, hna pek emaw inzirna tha zawk an neih zui theihna tur emawa hma lakpui an tum a, anni hian championship an tiphuisui hle.
A hawnna inkhawm aṭanga a tawp thlengin LPS Vision-in LPS 1-ah live-in inhnek zawng zawng a pe chhuak vek dawn a; Serchhip Boxing chuan inhnek an huaihawt tawha ropui leh hlawhtling ber a ni a, khaw mipuiin an hlutin a hmunah entu pawh an thahnem hle a ni an ti.