Italian sorkar chuan Rome khawpuia hmun hmingthang, Colosseum chu chei thata a tlawhtuten gladiator-te an lo insualna thin an hmuh theih nan a laiah a chhuat phahna tur a pawm.
Culture Minister Dario Franceschini chuan a chhuat nei tura an duan hi Pathianni khan a puang.
Italian engineering firm Milan Ingegneria chuan a chhuat siamna tur contract hi Euro maktaduai 18.5-a a design leh sakna tur an chang.
He chhuat siam belh hi kum 2023-a zawh hman tur a ni.
Tunah hian kum 2,000 zeta upa tawh hmun hmingthang hian chhuat a nei lo va. Kum zabi 19-naah khan archaeologist-te chuan an la sawn vek a, hei hi a chhunga lei verh, gladiator-te ramsa insual turte awmna leh an kalkawng an hai chhuah theih nana an tih a ni.
Franceschini chuan a chhuat an siam leh tur hmang hian a tlawhtute chuan Colosseum hi a lai tak atangin a nihna dik tak an hmu thei dawn niin a sawi.
“Hei hi rahbi pakhata hmalam kan panna a ni a, he thil hlu kan vawn thatna kawnga hna lian tak, Colosseum awm dan pangngai ang kan neih leh theihna tura ruahmanna a ni,” a ti.
Minister chuan a chhuat siama a nihna ang taka Colosseum hi din a nih leh hunah chuan cultural event pawh huaihawt theih a nih tur thu a sawi.
Milan Ingegneria hi nikuma sorkarin Colosseum chhuat awng phah thei tur a zawnna chhangtu 10 zinga mi an ni.
An duan dan chuan thing phek te tak tete remkhawm tur niin a hnuaiah eng leh boruak kaltlang thei tura a ni.
Culture ministry chuan sq metre 3,000a zau chhuat h a inlet thei dawn a, nakin zelah chuan a dang (design dang) pawh siam theih tur a nih dawn thu an sawi.
Colosseum Roman Empire-a amphitheatre lian ber a ni a. Gladiatorial fight leh vantlang ennawm chhuahna hmun niin mi 50,000 vel thut lenna a ni.
Coronavirus avangin khualzin khuahkhirh a ni chungin Italy-a hmun tlawh hlawh ber a ni a. Hrupui a len hma, kum 2019 khan mi maktaduai 7.6 chuangin an tlawh.