Aizawl: Mizo Students’ Union (MSU)-in sorkar pension kum, kum 62-a tisang tura dilna awm an duh loh thu sawiin dodalna pawh sorkara thlen an tum.
Nimina MSU hruaitute thukhawm chuan sorkar hnathawk intelkhawm, FMGE&W-in sorkar hnathawkte pension kum, kum 60 atanga kum 62 a tisang tura sorkara an dilna chu ram leh hnam, sum dinhmun leh hna zawng laite dinhmun thlirin tha an tih loh thu an sawi a. Rawtna hi an dodal thu sorkara thlen an tum a ni.
Mizoram sorkarin sorkar college hrang hranga under graduate leh post graduate course thar a hawnah te zirtirtu dah a ni em tih leh zirtirtu an indaih em tih pawh MSU hruaitute thukhawm chuan zirchian ni se, an ti a. Govt. Champhai college-a Commerce building sak hna khawtlai chungchang pawh sawi hovin, sum awm sa, kum 2019 a sak tan tawh tun thlenga sak zawh a la ni lo chu pawi an tih thu sawiin, he hna thawktu company leh sorkar chu a rang lama hna la zawh loh awm te zo thuai turin an ngen bawk.