Formula 1 world champion ni lai Red Bull Racing chuan kumin a Formula 1 season thar a an lallukhum humhim an tumna tur car hmelhmang an pholang.
Kum dang ang thovin Red Bull car ran dan tur leh a rawngte hi a danglam thui lova, nimahsela Red Bull lam hian Manhattan a Classic Car Club a an tel tumin tun season-ah United States a intlansiak pathum – Miami, Austin leh Las Vegas-ah te fans ten an design angin car an chei rang ang.
RB19 hi a hmelhmang tur chauh phochhuah a la ni a, season thar atana testing an neih hunah erawh a nihna tur ang tak tak hriat a ni chauh dawn a. Pre-season testing hma hian team hrang hrangten an car theihna chauh ni lovin a hmelhmang dik tak leh an siamdan te an phochhuak duh ngai lo.
Kuminah hian Red Bull hi team dangten an el ber tur an ni a, nikum khan intlansiak 18-ah pakhatna hauhin an driver Max Verstappen chuan vawi 15 pakhatna hauhin awlsam takin world champion a ni.
Hetihlai hian kum 2021 season-ah an sum hman theih bak an pelh avangin hrem an ni a. An hremnaah hian pawisa chawitir an nih bakah car an siam hun chhung chu 10% a tihhniam a ni.
American car company hlun Ford chu Formula 1-ah a kir dawn a, Red Bull nen hian kum 2026 atangin engine siamin an thawkdun ang. Kum 2004 hnuah F1-ah a inrawlh ve leh dawn.