- Lallunghnema, Charity Lodge
Consumerte dikna leh chanvo humhalh kawnga ka lungrualpui Pu RL Rinawma IRS(Rtd) hi thurawn min petu leh fuihtu tha tak a ni a.Ka tan a hlu khawp mai.Pu Dikate,Pu Rohnunate,Pu Lianlula Sailo,Legal Metrology hotupa ni thinte leh thian tha tam tak zarah consumer complaint buaipuiin ka la hmanhlel ta reng a ni.Min support-tute avangin lawmthu ka sawi thin.Ka sawi zel bawk ang.
Anni bakah hian Ukil tha tak tak min phurpuitu ka neih belh zel a.Ka lawm hle a ni.Aizawl District Consumer Disputes Redressal Commission President Pu Mawia leh a thawhpuite pawh hi an che tha chho zel turah ngai ila.Thu ka lo dawn danin kumin kum thar tir chho teah pawh hian complaint 4 vel an dawng der tawh a nih hi!
Kum tam a vei ta, tun thleng hian Consumer Right leh issue eng eng emaw ka ziak chho mek zel a. Ka tawnhriat ka zep tel zel bawk.Tun hnai te tak tak hian Consumer case hengte hi ka buaipui mek.
Mobile repairing case,tv lei chungchang,in sak ( building construction)chungchang,electric bill sang chungchang.Diplomatic taka hmalak ngai tak vek an nih hi.Mipui hmangaih dan kawng tha tak a nih hi, ve a !
Passenger care ngaih pawimawh a tulziate, consumer-te chu anmahni zawn zela huaisen a tulziate kan sawi a. Ka article hnuhnung berah khan private damdawi in pakhat hrem a nih thu ka sawi a. Kha thil thleng kha Mizoram pawnah a ni.
Mizoramah,he Mizoramah ngei hian kan thlentir ngam ve ang em?
Thian chhan thih ngam Zoram leilungfate hian kan ngam ve ang em?tih kan inzawt a nih hi!
Kan sawi thin angin Mizoramah hian consumer – te hi kan la dawih em avangin Consumer Case lian tham a awm ngai meuh lo. Vairamah chuan mihring dikna an ngaih pawimawh em avangin mawi pawh thlu lovin consumer-te chuan an dikna leh chanvote chu khawi court-ah pawh an kalpui ngam zel a ni.
Hetih lai hian keini erawh chu a dawihzep tawk chauhvin Pathian rhu kan awih a.A him chinah kan hawihhawm a; sual khawi ngam tawkin kan inti tha a, kan fel a, Kristian tha tak angin kan awm thin a ni.
Isua hnung kan zui dan hi kan in enfiah a ngai ta khawp mai. Kristian lo zawk hi an huaisen ta zel em ni? kan ti ta hial. Tuna kan hmabak chu huaisen khawp a Kristian tha nih hi a ni. Sawi sawi lovin a tih a tih ngam tur a ni mai.
Tun tumah hian Road Transport pakhat hrem thu ka sawi dawn.Lo ngaithla teh u.
Mizoramah Transport Agency kan nei thahnem ta hle. MST kan nei a, Maxi Cab kan nei a, bus kan nei bawk, an tlan fua fua thin. Passenger an phur thin. An passenger te nawmna, muanna leh himna chu an ngaihtuah tur ber chu a ni a. An tih tur dik tak a ni bawk.
Telangana State-ah khuan State Road Transport a awm a, hmun hrang hrangah an tlan kual a. Passenger tam tak an phur thin. An hna ber chu passenger te tum ram hruai thlen a ni. Mahse, an inthlahdah avangin Consumer Commission hmaah khin an ni.
Hetiang hi thil thlen dan chu a ni:- Complainant leh a thiante hian Hyderabad — Chennai AC bus ticket an la a. Mahse chu bus-a chhuah dawn(departure. time) a ruaiah bus chu chhuanlam eng eng emaw avangin a tlan chhuah loh tur thu an lo hrilh a. Transport service thuneitute chuan bus dang ruahmanna an siam tur thu leh bus ticket chu refund leh theih a nih thu an lo hrilh a.Mahse,complainant Narayan Das Sanjay leh a thiante chuan an thiltih tura ruahmannaah namen lovin harsatna an tawh phah a ni. Chuvangin he State Road Transport hi District Consumer Commission I, Hyderabad hnenah zualkovin an dikna leh chanvo humhalh a nih theih nan compaint an thehlut ta a ni. CC NO.233/2022 pein Complaint ziah luh a ni.
Tichuan, he District Consumer Disputes Redressal Commission hian ngun taka lo ngaihtuahin section 35 of CPA, 2019 bawhchhiain unfair trade practice leh deficiency in service a awm ngei niin a hria a. Heta thubuai remtute hi Justice B. Uma Venkata Subha Lakshmi – President, Mrs. C. Lakshmi Prasanna leh M R. Narayana Reddy, Member zahawm tak te an ni a. Commission President leh Member te hian Road Transport hi ticket man Rs. 530/-, mental agony charge Rs. 2000/- leh cost of litigation Rs. 1000/- an chawitir ta a ni.
Hetiang thil, vairama thleng hi engvang a ziak nge ka nih? kan inzawt! Chhiartute paw’n in rilruin min zawt mai thei. A chhan chu — Mizorama Zofate hian mi sual khawi ngam thin hek i!
Mizoramah hian heng Transport Service te hi an dik lohnaah chuan i khing ngam ve ang u. Phun liam mai mai lovin..kan ti a nih hi,u Lian!
Hmanni lawka ka inleng thenkhat chuan MRP aia sanga thil an lei thu an sawi, an phun an phun a! An ngawi lian leh ringawt, an ho kher mai! Tun hnaia complaint ka hnen a lo lut thenkhat hi chu nuihzat thlak a awm nual mai. Buaipui loh theih si loh! A hahthlak thin khawp mai!
Mahse, kan ti nek nek a, a fel ve leh mai thin bawk. Buaithlak thin erawh chu, cash memo emaw receipt emaw voucher emaw awm lo thin hi a ni.
Ih e, chhiartu duh takte u, in bazar-naah hian cash memo/receipt-te hi i la thin ang che u aw, tiin ka thu leh hlate hi ka’n titawp ang e.
Pathianin rem a tih chuan chawlhkar lehah nasa zawkin kan titi leh ang.
Thil lei nuam!
Service hman nuam ule!