Musharraf-a hian an ram a hruai chhungin thah tumna vawi tam a pumpelh a, a hun lai hian an ram chhunga Islamist leh khawthlang ramte a inkarah awmin hun khirh takah a awm a ni.
US-in 9/11 attack hnua ‘war on terror’ a kalpui kha a thlawp em em laiin an ram chhungah erawh Islamist firfiakho beihna kha duh lotu an tam hle thung.
Kum 2008-a an ram inthlanpuiah khan hnehna a chang zo lo va, thla ruk hnuah an ram a chhuahsan.
Kum 2013 khan an ramah kir lehin inthlan chuh a tum a; mahse, lo man niin inthlan chuh thei lo tura tih nghal a ni a. An ram phatsana che-ah puh niin amah a awm lo chungin thi tura hremna pek a ni a; mahse, a hnu thla khat lekah he thutlukna hi hnuh kir a ni.
Kum 2016 khan inenkawl turin Pakistan a chhuahsan a, an ramah a kir leh ta miah lo a ni.
Musharraf-a hi a hun laia ro a rel dan kha uchuak tak taka chetna a tam nia sawi thin a ni a, hetih rual hian an ram sum leh pai dunhmun nasa taka chawikangtu anga hriat a ni bawk.
A hun lai hian prime minister hlui, Benazir Bhutto chu kum 2007 khan Taliban-in an thah a ni a, hei hi a sorkarin vengtu a pek that tawk loh vanga puhna a awm a, sawi zui leh dem a hlawh phah hle.
A hun tawp lamah thi tur hiala a chungthu rel ni mah se a thawhpui thin, tuna Imran Khan-a kaihhruai party-a hruaitu lawk tak, Fawad Chaudhury chuan Musharraf-a hi fakin Pakistan tan hnuhma duhawm tak tak a hnutchhiah niin a sawi.
“Military dictator tia sawi a ni a; mahse, a kaihhruaina hnuai aia mipui rorelna kalphung kha a awm chuang lo. Musharraf-a hian Pakistan-in hun harsa ber a tawh laiin ram a hruai a, Pakistani-te hian a hun lai kha Pakistan chanchina hun duhawm berah an ngai hial ang,” a ti.