Mizoramah kohhran huang pawn, court-a innei an pung chho zel a, nikum chhung khan Aizawl Bawrhsap hmaa innei nupa tuak 22 an awm a, an zinga tuak ngate chu Mizo leh hnam dang inneih pawlhte an ni.
Aizawl Bawrhsap pisa atanga The Zozam Times thudawn danin nikum khan The Special Marriage Act, 1954 (Act No. 43 of 1954 section 13) dan hnuaia court-a innei nupa tuak 22 awmin, an zing nupa tuak 12-te chu Mizo leh Mizo innei niin, tuak ngate chu Mizo leh hnam dang inneih pawlh an ni a, nupa tuak thumte hnam dang innei an ni thung.
Mizo leh hnam dang inneih pawlh nupa tuak nga zinga palite chu Mizo hmeichhiain hnam dang mipa an neihna niin, Mizo mipa pakhatin hnam dang hmeichhia a nei bawk. Kuminah nupa tuak khat, Mizo leh Mizo Aizawl Bawrhsap hmaa innnei an awm tawh bawk a ni.
Aizawl Bawrhsap pisa-a thawktuten an sawi danin bawrhsap hmaa innei thenkhat chu kohhran huang chhunga innei tawh, India ram pawna an awm dawn avanga visa dil nan emaw, an hnain court-a inneihna document a phut avang emawa court hmaa innei tha leh te an ni a, kohhran huang chhunga inneihna kalpui lova court-a inneih duh zawk avanga bawrhsap hmaa innei pawh an awm ve bawk.
Court-a innei tur hian bawrhsap pisa atangin marriage form leiin nu leh pa hming nen dik taka inziah luh a ngai a, an awmna khua/veng VC/Local Council hnen atangin an khua/veng mi nihna lehkha an lak a ngai bawk, chungte chu an thehluh hnuah bawrhsap-in hriattirna a tichhuak ang a, ni 30 a ral hnuah inneih a rem lohna thu lut a awm loh chuan inneihna chu kalpui theih a ni.
Court-a innei tur hi complaint a awm mang loh thu bawrhsap pisa-a thawkte chuan an sawi a, tum khat chu innei tur chhungten an remtih loh thu an thlen avangin bawrhsapin a inneihtir tak loh chu a lo awm tawh.