Azl: Govt Hrangbana College Students; Union-in an college zirtirtu post ruak hnawh khat turin sorkar phutin February 6, 2023 hmaa an tihhlawhtlinsak an nih loh chuan tiam chin awm loa lungawi lohna lantir an tum.
HBC SU chuan, January 27, 2023-a Asst. Profressor (contract) regularization tihchhuah avangin zirtirtu paruk sawn chhuah tura tih an ni a, an post ruak hnawh khat turin zirtirtu pathum chauh dah tura tih a ni chu hriatthiam har an tih thu an sawi a. February thlaa pension tur pahnih awmin kuminah hian pension tur eng emaw zat an awm bawk nia sawiin, Mizoram sorkar hnuaia college zirlai tam berna ni chungin class lak hleih theih loh khawpa zirtirtu indaih lohnaah ngaihsak an hlawh lo chu pawi an tih thu an sawi.
Zirtirtu post ruak hnawh khat tura sorkar thuneitute vawi eng emaw zat an hmu tawh chunga an ngenna tihhlawhtlinsak an ni lo chu pawi an tih thu an sawi a. An thil phut hi vawiin ral hma ngeia chhanna an hmu lo a nih chuan tiam chin awm loa lungawi lohna lantir an tum.