Kolasib leh Mamit Sub-headquarters YMA-in kum 2020-a zawh tur Langkaih lei, bailey bridge thlakna tur lei thar tun thlenga dawh zawh a la ni lo chu hnathawktu leh sorkar inthlahdahzia lannaa an ngaih thu an sawi.
Sub-hqrs YMA pahnih hruaitute chuan Inrinni khan district pahniha hmasawnna hnathawh hrang hrangte an enfiah a, Mizoram leh Tripura inrina, Langkaih lei, bailey bridge thlakna tura pre-stressed concrete girder bridge dawh hna thawk tura thlan Sadguru-ten tui chhung ban chhun hna chiah thawka hmalakna dang an la nei lo chu hriatthiam har an tih thu an sawi.
Kum 2020 daih tawha zawh tur, tun thlenga hmalakna mumal pawh la awm lo chu hnathawktu leh sorkar inthlahdahzia lanna nia an ngaih thu sawiin a rang thei ang bera he lei dawh hna hi thawk turin an hriattir.
Sub-hqrs. YMA hruaitute chuan Bairabi-a Tlawng lui river training works hnathawh mek pawh tlawhin hmun pawimawh lai tak changtu contractor pakhatin hna a la tan thei lo chuan harsatna nasa zawk a thlen thei dawna a lan vangin furpui thlen hma ngeia hna tana hma la turin an ngen.
Bairabi – Zamuang (BZ Road) pawh enin he kawngpui, Tripura lam atanga Mizoram châk lakna pawimawh chu furah chuan kal theih loh khawpin a chhe ngei dawn nia a lan thu an sawi a. Harsatna a thlen lohna turin sorkarin a rang lamin siam se an duh thu an sawi.
Teirei lei (bridge) dawh hna thawh mek pawh enin hnathawktute pawh an kawm a. Hnathawktute chuan hmanraw tha an hman thu an sawi a, a hun takah, tha taka hnathawh zawh a nih theihna tura hma la tura hrilhin, YMA-in an vil zui zel dawn tih an hrilh bawk.