Aizawl: Mizo Zirlai Pawl (MZP) chu Inrinni khan Aizawl khawpui hmun hrang hrangah hnam dang dan lova khawsa dap chhuakin an hnatlang a. Inner Line Permit (ILP) nei lo an hmuhchhuahte chu thuneitute kutah an hlan.
MZP bultuma dan lova hnam dang khawsate dap chhuah hnatlangah hian MZP hruaitute bakah college hrang hrang students union hruaitute leh hnam pual zirlai pawl hrang hrang hruaitu mi thahnem tak an thawk chhuak.
Hnatlanga thawk chhuakte chuan ILP nei lo leh permit dam hun chhung zo tawh mi 37 chuang bakah kumtlinglo hnathawka chhawr thahnem tak an hmuchhuak a, chung mite chu nimin vek khan thuneitute kutah an hlan nghal a ni.
MZP chuan ni khat hnatlangah hnam dang permit nei lova khawsa leh dan lova sumdawng thahnem tak man chhuah tur an awm chu pawi an tih thu an sawi a. Hnam dang dan lova khawsa an hmuh chhuahte chinchang chu an ngaihven zui tur thu sawiin Mizorama dan lova hnam dang sumdawngte dap chhuakin a tul angin hma an la zel dawn tih an sawi bawk.
ILP pek chhuah dan chungchangah fimkhur leh zual turin MZP chuan sorkar thuneitute an ngen a. VC leh local council pawh hnam dang ILP pekna tur kawngah document felfai lo chu hriatpuina lehkha pe chhuak tawh lo turin an ngen bawk a ni.