India rama Taekwondo inelna lian 39th National Junior Taekwondo Championship-ah Mizoram aiawh a khel ten gold leh bronze medal an la.
February 3, Zirtawpni atanga Pathianni inkar khan Visakhapatnam-ah inelna hi buatsaih a ni a. Mizoram gold medal hi Pansy Rampanzeli leh Joseph Vanlalpekhlua ten Poomsae Pair inelnaa an lak a ni.
Pansy hian individual inelnaah bronze medal a la bawk a. He championship a referee official a kal, national referee C.Lalzuitluanga chu Best Referee of the Tournament atan thlan a ni.
State 32 bakah Services team telna Championship-ah hian Mizoram Amateur Taekwondo Association chuan player pariat a tir a. Kyorugi inelnaah player paruk telin quarter-final thleng awm mahse medal an la zo lo.
Mizoram team hi Lalduhawma, Armed Veng South leh Doris Lalhmangaihzuali, Kanan Veng ten an hruai.