Mizoram Cooperative Siam Tha Pawl (MCSP) chuan cooperative society dan hman lai mekah siam that ngai tam tak a awm niin an sawi.
MCSP hruaitute chuan nimin khan Aizawl Press Club-ah thuthar thehdarhtute kawmin society-in dan an hman lai chu state danga chengte mila siam a nih thu leh Mizorama hmang tur chuan siam that tur tam tak a awm thu an sawi a, “Dan hi siam that a ngai a, sorkarin kut a thlakna tur a ni,” an ti.
Mizorama cooperative society-ten hma an sawn zel theih nan sorkarin tih tur tam tak a neih thu pawh sawiin, society-te dawm chhuahna turin project chi hrang hrang tun aia tam duan chhuah ngai an tih thu leh chutianga hma la tur chuan sorkar an phut thu an sawi.
MCSP hruaitute chuan an pawl chu Mizoram pum huapa cooperative society zawng zawngte huapzo tura kumin January-a din a nih thu an sawi a, an pawl thil tum hrang hrang thuthar thehdarhtute an kawmnaah hian an puang.
Cooperative chhungah party politic ang maiin pawl pawla inthenna a awm nia sawiin, hei hi nuai bova dikna leh rinawmna tun din an tum thu an sawi a. Cooperative principle leh idealogy tun din te, cooperative federal movement siam that leh tihchak te, thingtlang lo neitute tana agriculture credit society tam zawk din leh rural credit network tihchak te an tum thu an sawi.
MCSP hruaitute chuan cooperative society hruaitu bawrah pawh siam rem ngai tam tak a awm nia sawiin, cooperative idealogy leh a principle te mila leadership siam leh inthlan dan hrisel zawk, cooperative zirtirna dik vuan tlat hruaitu leh worker a tam thei ang ber siam chhuahte pawh an pawl din chhan a nih thu an sawi bawk.