Aizawl: Mizoram Pradesh Congress Committee (MPCC)-in Mizoram Budget zirhona a buatsaiha zirtirna petu, Dr James LT Thanga, Associate Professor, Department of Economics, MZU chuan Covid-19 hripui hun laia Mizoram pawisa dawn tur anga sawi, hmuh loh zawng zawng hi hmu mah ila hman theih vek a nih loh thu leh hloh anga sawi tur a nih loh thu a sawi.
Congress party chuan nimin khan an pisa-ah Assembly Budget Session lo awm tur atana inbuatsaihna, Government Budget zirhona an buatsaih a. He hunah hian Dr. James LT Thanga chuan zawhna chhangin Covid-19 hripui hun laia Mizoram pawisa dawn tur anga sawi, hmuh loh zawng zawng hi hmu mah ila hman theih vek a nih loh thu a sawiin, “A hman theihna erawh thlan bik awmin, duh ang anga Mizoram sorkarin a lo hman ngawt theih a ni lo a, hmu tam eng ang mah ila hman vek theih loh a nih avangin kan hloh anga sawi tur a ni lo,” a ti.
Dr James LT Thanga chuan Mizoram finance chungchanga hriat tur pawimawh tak tak a sawi a; revenue deficit leh fiscal deficit a san tawh chuan treasury khar ngam mai pawh a Kristian zia zawk thu a sawi a. Mipuiten chik zawka Mizoram budget lo zirchian vea hma sawn zel dan tur ngaihtuah ve turin a chah bawk.