Aizawl: Congress Thalai chuan tun hnaia India sorkarin Adani Group hnena SBI leh LIC te sum a peipuntir duh lohna an lantir.
Indian Youth Congress (IYC), New Delhi huaihawtin nimin khan ram pumah Congress Thalai chuan sorkar laipuiin Gautam Adani company-te SBI leh LIC te sum peipuntir duh lohna a lantir chu MPYCC pawhin zawmin State Bank of India, Main Branch kawtah an pungkhawm.
MPYCC chuan central BJP sorkarin a sangawizawnpui, Gujarat-a sumdawng mi hausa, Gautam Adani-a company-te uchuak taka thang anga an lan theih nan leh stock market-a an share-te an man tur aia a let za tela a san theih nana SBI leh LIC-te Adani company-ah te a invest luihtir demna thuziakte an keng a ni.
Thuchhuah an siamah MPYCC hian khawvela investment research firm rinhlawh berte zinga mi, Hindenberg Research chuan Adani Company inrelbawl danah thil dik lo nasa tak leh inbumna awm ni ngeia ngaih chu January 24, 2023 khan thuchhuah an siam hial niin an sawi a. Hemi hnu atang hian Adani Company share-te chu nasa takin an tlahniam a, LIC policy latu mi vbc 39-ten Rs. vbc 33,060 vel an hloh tawh a ngaih a nih bakah SBI leh nationalised bank hrang hrang Adani Company-in Rs. vbc 80,000 vel zet a puk pawh chân thei dinhmunah an awm mek niin an tar lang bawk.