Aizawl : PC party thalaiin MZP bultuma Aizawl-a hnamdang dan lova awm manchhuah te lakah hremna lekkawh ngei turin thuneitute an phût.
Tun thla ni 4-a MZP bultuma Aizawla hnamdang dan lova awm, ILP nei lo leh ILP thi tawh mi engemawzat man chhuah, sorkar thuneitute kuta hlan tawh te chu PC party thalai chuan dan hmanga hrem ngei an phut a. Mizoram hmun hrang hranga dan lova hnamdang khawsate dapchhuah rúnpui nei tura PC party-in thunei tute an lo ngen fo tawh thinna ten beisei a phàk loh laia, MZP, Aizawl-a College hrang hrang SU hruaitute leh hnam pawl hruaitu ten Aizawl-a dan lova hnamdang khawsate dapchhuah hna an thawk chu fakawm an tih thu an sawi.
PC party thalai chuan online portal hmanga ILP dil theih a nih tawh chinah phei chuan ILP pekchhuah leh a vil zui pawh a awlsam tawh dawn nia sawiin, hnamdang ILP neilo leh an ILP thi tawh, la châmbang an awm tawh loh an beisei thu an sawi a. Mizote khawsakna leh eizawnna atana hnawksak leh buaipui tham hnamdang dan lova sumdawng mèk leh an pung zel tur te dan chah kawnga theihtawp chhuah turin Mizoram sorkar an ngen bawk.