- Ruata
India rama lirthei company te zinga lar pahnih Nissan leh Renault chuan lirthei thar an tlangzarh leh thuai dawn niin a lang a. Nissan hian 7 seater MPV thar tlangzarh an tum a, Renault lam chuan an lirthei lar sa em em, khawvela huapa lar Duster chu a thar India market-ah an tichhuak leh dawn bawk a ni. Heng lirthei te hi company pahnih thawkdunin an duan hmel a, an thawhdunna dan tur leh lirthei an siamchhuah dun dan tur hi chu chiang zawkin kan la hre chho zel turah ngai ila.
Nissan lirthei thar
Nissan hian an Utility Vehicle huang zauhin rei vak loah lirthei thar an rawn nei nual dawn a. Tunah hian enchhin mek zingah Nissan X-Trail leh Qashqai SUV te a awm a. X trail zawk hi kumin kum laihawl chhoah hian an tlangzarh hman a beiseiawm a, hei hi SUV lian, Toyota Fortuner te nena inel tur a ni. Company lam chuan tunah hian Renault Triber nghahchhanin MPV thar, mi 7 chuan theihna tur an duang dawn tih an puang tawh a, hei hi CMF-A+ platform nghahchhana duan tur a ni.
He Renault Triber nghahchhana duan tur Nissan 7-seater MPV thar tur hi chiang taka puanzar a la ni lemlo a. Hetihlai hian a hmanraw kentel leh a nihphung hrim hrim hi chu a tam zawkah Renault Triber a tawm hmel a. Tunah hian Renualt Triber hian 1.0L, 3-cylinder, naturally aspirated petrol engine hmangin hei hian 71bhp power leh 96Nm torque te a pechhuak thei a. He Nissan MPV thar turah hian turbocharged petrol khawl pawh kan hmu maithei a, manual leh AMT gearbox te duthlan tur a awm hmel bawk a ni.
Design lamah chuan Nissan 7-seater MPV thar tur hi Renault Triber nena khaikhin chuan a danglam deuh dawn niin a lang a, a design element hrang hrang chu tuna chhuak mek Nissan Magnite nen a inpawl dawn mah zawk a ni.
A len zawngah erawh Triber nen a inang chiah dawn a, a ken tel turah hian 8-inch touchscreen infotainment system with wireless Android Auto and Apple CarPlay connectivity, keyless entry, removable third row, push-button start, second row recline, roof-mounted AC vents (middle & third row passenger tan), LED lighting, leh thildang hrang hrang a awm beisei a ni.
Nissan X-Trail SUV thar tur thungah chuan 1.5L turbo petrol engine kan hmuh hmel a, hei hi mild hybrid emaw strong hybrid tech emaw duhthlan tur a awm ve ve dawn a nih hmel a. Mild hybrid version 163PS power leh 2WD system a nei ang a, strong hybrid model hian 204PS power leh 2WD leh AWD duhtlan turte a nei ve ve dawn thung a ni. X-Trail hi mi 5 leh 7 chuan theiha duan tur a ni.
Renault lam ve thung
Renault-Nissan tangkawp hian Indian market-ah lirthei chi hrang hrang Renault Duster, Nissan Triber nghahchhan 7-seater MPV leh entry-level electric lirthei thar te an duang chho dawn a. All-new Renault Duster (third-generation) hi kum 2024-2025 chhoah India ram kawngpuiah kan hmuh a rinawm a. He SUV rawn chhuak thar leh tur hi CMF-B modular platform nghahchhana duan tur a ni.
A lirthei landan lamah chuan Renault Duster thar tur hi Dacia Bigster concept design zula duan tur a ni dawn a. Tuna Renault Duster kan hmuh ai hian a danglam deuh dawrh tawh dawn a ni. A hma aia a len zawk te beisei a ni a, a hmanraw kentel hrang hrang pawh a thain a changkang zawk hle tawh dawn a ni.
A khawl lamah chuan Renault Duster thar tur hian 1.2L turbo petrol engine, 48V hybrid tech awm tel a hman beisei a ni a. He khawl hian 130bhp power vel pechhuak tura beisei a ni. 1.3L turbo petrol engine pawh a hmang zawk maithei a, hei hi chu company lamin an rawn tichiang thuai turah beisei ila. AWD (all-wheel drive) system a nei ang a, a khan a sang tha viau dawn bawk a ni.
Renault leh Nissan hi company thawkdun reng niin tuna kan lirthei tarlan tak te pawh hi a tam zawk chu an thawhdunna hnuaia duan leh tur an ni a. Reiloteah SUV leh MPV thar tha tak tak leh changkang tak tak an ni pahnih tangrual atangin kan hmu leh thuai dawn a ni. An thawhdunna hi Renault-Nissan-Mitsubishi Alliance hnuaia an inzawmna atanga an hmalakna a ni.