Lazio in Serie A-ah pathumna nih theihna hun nei mahse hnehna an chan zawh loh avangin an huntha an hloh a, 1-1 in Hellas Verona nen an inhnehtawk.
Thawhtanni zanah Stadio Marcantonio Bentegodi-ah Maurizio Sarri pawlten halftime dawnah goal an khung a. Spanish forward Pedro chuan penalty area hmawrah ball inher puiin hmunawl a insiam a, an goal hmahruai a khung mawi hle.
Nimahsela mualneitu lamin second half tan hnu lawkah an si phurh an sut a. Set piece an neih remchangah la in Cyril Ngonge chuan a tauh lut.
Verona hian goal an khung hnuah hma an hruai zui teuh a, Darko Lazovic chuan hlauhawm takin ‘goal shot’ a nei a, goal ban a fuh hlauh.
Lazio pawhin inkhel tawp lam thlengin goal hlauhawm an insiam ve thei thova, nimahsela team pahnihten goal an khung belh thei lo ve ve.
Inkhel zawhah Lazio coach Maurizio Sarri chuan, “Inkhel hautak a ni a, tu pawn a hautak dawn tih chu kan hrethiam sa vek. Hellas hi hmachhawn an awlsam lova, tunhnaiah an che tha hle bawk.”
“Hma kan hruaina kan hum thei lo thin erawh kan enfiah a ngai, point kan paih leh thin hi a pawm zam theih loh.” a ti.