Congress MLA chu kum 2010-a Gujarat-a Junagadh district-a buaina chhuak leh mi sawisakna thleng thubuaiah thla ruk lung in tang turin Thawhlehni khan court-in a ti.
Judicial Magistrate First Class Snehal Shukla-i court chuan Somnath bialtu Vimal Chudasama leh mi dang pathum chu thla ruk tang turin a hrem a ni.
Court hian hremna pek chu thla khat tihkhawtlaisak nghalin hei hi thiam loh changten sessions court-a an chungthu remna an khinlet theihna hun atan a ti a ni.
Chudasama leh mi dang pathum – Hitesh Parmar, Mohan Vadher leh Ramji Bero te hi Indian Penal Code sections 323 (voluntarily causing hurt) leh 147 (rioting) tlawhchana thiam loh chantir an ni.
Thuremna tihchhuahah chuan Chudasama leh a thiante hi dan lova pungkhawmin ngunhnam leh revolver an keng a, thubuai thehluttu, Meet Vaidya chu traffic jam-a an tan laiin, November 7, 2010 khan kut an thlak nia tar lan a ni.
FIR thehluhah chuan a thehluttu hi an sawisa nual a, a lirthei pawh an tihchhiatsak nia tar lan a ni.
Chorwad Police Station-ah thubuai ziah luh niin IPC section hrang hrang hmangin thubuai hi siam a ni.