Prime Minister Narendra Modi chuan mi thiltithei thenkhat, India-in thingpuia hmingthatna a neihte tihhniam tuma phir ru an awm niin a sawi.
Modi hian nimin khan Assam-a Sonitpur district, Dhekiajuli thlengin Asom Mala scheme hnuaia kawng sial thar, Rs Vbc 7,700 senna hawngin Biswanath Chariali leh Charaideo-a medical college sakna tur lung a phum bawk.
Assam Chief Minister Himanta Biswa Sarma pawhin an telpui.
Hun a hmannaah hian Modi chuan, “Lehkha pawimawh kan hmuh chhuah hrang hrangah ram dang atangin thiltithei tak tak, India-in tea industry-a hmingthatna a neihte tihhminghliau tuma hma an lakna inziak chu hai chhuah a ni,” a ti.
“Rilru hniam tak puin kan tea industry hi nasa taka sawp leh tihhniamsak tumin min bei a; mahse, eng anga tam pawh ni sela kan phal ngai dawn lo a ni,” tiin Modi-a chuan a sawi.
Modi-a chuan medical student-te pawh fuihin an zirlai chu tual chhunga mite hriat thiam theih turin, Assamese tawng ngeia an sawi chhuah thiam theih nana tan la turin a ti.
“Damdawi lam zirna lehkha hi tual chhung tawnga zirin doctor tha a nih theih loh em ni? Tunah hian Assam-ah medical college thar paruk din tum a ni a, kan zirlaite hi Assamese ni ngei rawh se,” a ti.
Prime minister chuan Assam chhunga highway pawimawh leh lian tak takte chu Asom Mala scheme hnuaia sial a nih thu a sawi a, hei hian inkalpawhna a tiawlsam a, khawpui atangin awlsam takin thingtlang ber pawh tlawh theih a nih phah thu a sawi bawk.