Tripura-a sorkarin court thu anga zirtirtu a bântirte chuan Tripura High Court leh an state-a Human Rights Commission-ah lehkha an thehlut.
Zirtirtute hian high court-ah hian an chunga thil thleng duh loh lantir zui phalna an dil a. Human Rights Commission hnenah hian January 27-a police-in an beihna chungchang an sawi bawk.
Supreme Court thu angin sorkar chuan nikum March thlaah khan zirtirtu 10,323 chu an hna thawk tura lak danah fel lo a awm avangin bântir an ni.
Heng zirtirtute hi Agartala khawpuiah December 7 atang khan an inhawr khawm tawh a, an hna thawh leh an duh.
Ni 51 zet lungawi lohna an lantir hnuah police leh sorkar thuneituten hma lain a hnawt darh ta a ni.
“Tripura High Court-ah lehkha thehlutin hna kan thawh leh theih nan muanawm taka lungawi lohna kan lantir leh phalna kan dil,” tiin Joint Movement Committee-a an hruaitu, Bijay Krishna Saha chuan a sawi.
“District thuneituten lungawi lohna lantir a phal lo va, high court-ah kan thlen a. Kan thu thehluh hi an ngaihtuah thuai kan beisei,” a ti bawk.
Saha chuan Human Rights Commission-ah hian police-in an hnawh darh danah mihring dikna chanvo an palzut niin a sawi.