Govt Hrangbana College zirlairte chu zirtirtu pek belh phutin nimin chawhma dar 9:30 atang khan Chanmari kawna an college tualah lungawi lohna lantirin an pungkhawm.
Govt HBC Students’ Union hruaitute chuan zirtirtu indaih lohna avanga harsatna an tawh mekah vawi eng emaw zat sorkar thuneitute hnenah an thlen tawh hnu pawhin tihhlawhtlinsak an nih loh avangin thuchhuah an lo siam tawh angin February 6, 2023 ral hma, an hun tiam chin thlenga an mamawh ang chhanna leh inbiakna hlawhtling a awm loh avangin lungawi lohna an lantir thu an sawi.
Thuchhuah an siamah an college-ah hian zirlai 2,234 awmin zirtirtu 68 an awm mek a, heng zinga zirtirtu paruk sawn chhuah tura tih an ni a, post ruak hnawh khat turin zirtirtu pathum chiah dah tura tih a ni a. February thlaa pension tur pahnih awmin, kuminah hian pension tur eng emaw zat an awm bawk niin an sawi.
Mizoram sorkar hnuaia college zirlai tam berna ni chungin class lak hleih theih loh khawpa zirtirtu indaih lohnaah ngaihsak an hlawh lo chu pawi an tih thu an sawi a ni.
Higher & technical-in college hrang hrangte dilna chungchanga an thuchhuah chu thu tlingah an ngaih loh thu leh zirtirtu sawn chhuah an nih hmain sorkar hian college tinte mamawh mumal taka an enfiah hmasa lo chu pawi an tih thu an sawi bawk.
Zirlai pungkhawmte hian zirlaite hmakhua ngai lotu sorkar an duh loh thu te, nghah reng ngai sorkar an ngah reng hman tawh loh thu te leh zirtirtu an duh thutea au rualin, punkhawm hi chawhnu dar 2:30 vel khan an tin a ni.
Hrangbana Govt SU hruaitute chuan an thil phutte tihhlawhtlinsak an nih hma chuan lungawi lohna lantir an tum thu an sawi a ni.