Azl: ZORO hruaitute chuan All Mizoram Manipuri Association (AMMA) hruaitute chu an pisaah nimin khan an kawm.
ZORO hruaitute hian Manipuri hruaitute chu Myanmar atanga raltlante Manipur sorkarin a man a, jail-a a khungte leh Myanmar-a a thawn let thinte chu pawi an tih thu sawiin, hetianga an man zingah hian kum upa tak takte pawh an tel a, an khawngaihthlak hle a, nawr lette ngat phei chu an nunna atan a hlauhthawnawm thu sawiin, Manipur sorkar chu hetianga raltlante chunga nunrawng taka kut an thlak thinna titawp tura hma la turin an ngen.
AMMA hruaitute chuan Meitei leh Mizo hi tawng thu-ah pawh inhnaih tak a nih avangin hnam hnihte chu inlungrual taka khawsa ho tur an nihzia te an sawi a. ZORO hruaitute ngenna chu an lo sawiho ve tur thu leh tihhlawhtlin an tum tur thu te an sawi.