Aizawl: MPCC President Lalsawta chuan nimina Aizawl District Congress Committee huaihawta kum 2020-a Aizawl Municipal Corporation election leh local council inthlana Congress party candidate-te intawhkhawmna a hmanpuinaah, “Politics hi telna tlaka kan ngai lo a nih chuan kan duh lohte awpna hnuaiah kan awm dawn tihna a ni,” a ti.
Chanmari YMA Hall-a hun hmanah Lalsawta hian politics hi tlanchhiatsan theih a ni lo a, mi tin a hrut vek avangin ngaihven a ngai tih a sawi a. Mizoram buai lai pawh khan independent sual tul ti lote pawh khan an tuar ve vek a, a tuar nasa sa pawh an ni mai thei tih a sawi.
Lalsawta hian, “Politics hi telna tlaka kan ngai lo a nih chuan kan duh lohte awpna hnuaiah kan awm dawn tihna a ni. Chuvangin, politics tha kan neih theih nan theihtawp kan chhuah a ngai a ni,” a ti.
Congress president hian Rajasthan-ah te, Chhatisgarh-ah te, Arvind Kejriwal ngei pawh central-ah Congress a sorkar miah loh chung pawhin Delhi UT-ah a sorkar thei a; chuvangin, Mizoramah pawh Congress a sorkar theih lohna chhan tur pakhatmah a awm lo tih a sawi a. Party dangten sum ringin sorkar tum mah se Congress chuan Pathian chakna ringin sum hmang tlem chunga sorkar an tum dawn thu a sawi bawk.
Lalsawta chuan, “Mizoram hi taimate leh thawk rimte dinchhuahna ramah siam kan tum a. A dik lo leh mipui tizawmthaw zawngin ram kan hruai dawn lo. |ang Puihna hi khawvel ram tinah mihring dinchhuahna bul a ni. He |ang Puihna hmang hian kan thalaite leh eizawnna mumal nei lote tan eizawnna ngelnghet buatsaih sak a ni ang,” a ti.
He hun hi VL Robiaka, ex-MLA, ADCC President-in a kaihruai a, MPCC hruaituten an hmanpui bawk.