Aizawl: Class IX Science leh Mathematics zirlaibu Mizo tawng leh saptawnga dah kawp chu nimin khan Human Resources Development (HRD) Board Vice Chairman Dr L. Thangmawia’n a tlangzarh.
HRD Board vice chairman, MLA ni bawk, Dr L Thangmawia chuan zirlaite tana Class IX Science leh Mathematics zirlaibu Mizo tawnga chhawpchhuah a ni ta chu India ram ang pawha zirna lama mel lung pawimawh a nih thu a sawi.
He zirlaibu thar tichhuak tura ngaihtuahna sengtu School Education Minister Lalchhandama Ralte leh a hlawhtlin theihna tura bawhzuitu Mizoram Board of School Education (MBSE) te, Mizo tawnga lehlin hna thawktu zirtirtu leh mi thiamte lawmthu a hrilh.
Science leh Mathematics tawngkamte chu Mizo tawnga a tlukpui awm lo a tam avangin a lehlin hna a hautak hle tih sawiin Dr L Thangmawia chuan, “Sorkarin Mizo Language Development Board (MLDB) a din chu hnathawk theia a awm hunah chuan heng technical term tam takte hi Mizo tawnga seng lutin kan tawng tihausatu a la nih ngei ka ring,” a ti.
Zirlaiten Science leh Mathematics zirlaibute mahni tawng ngeia chhiar tur an nei ta chuan subject hara an ngaih thinna pawh a tihziaawm a beisei thu a sawi.
Dr L Thangmawia chuan, “Kan hnam tawng thiam tak chunga saptawng thiam tura tan lak dan kan zawn a ngai,” tiin, “Tun ang zela kan kal chuan saptawng thiam tak tak si lo, Mizo tawng thiam chuang si lo thahnem tak thangthar zingah an awm a hlauhawm,” a ti bawk.