Aizawl: Parliament thutkhawm mekah nimin khan union minister, Ayush changtu, Sarbananda Sonowal-a’n Aizawla Ayush Hospital khum 50 awmna dinna turin a thawh khat nan nikumah Rs. nuai 69.609 pek a nih thu leh a thawh hnihna atan Rs. nuai 100 pawm thar leh a nih tawh thu a sawi.
Ayush department hmasawnna tura India sorkarin Mizoram sorkar hnena tanpuina a pek dan chungchanga Rajya Sabha MP K. Vanlalvena zawhnate ziaka a chhannaah he thu hi tar lan a ni a. Saituala Ayush Hospital dinna tur Rs. nuai 100 pawm a nih tawh thu tar lan a ni bawk.
Union minister-in zawhna a chhannaa a lan danin kum 2015 atanga 2021 chhungin Mizoramah hectare 373-a zauah ramhmul damdawi (medicinal plant) chinna hmun siam a ni tawh a. Ramhmul damdawi chinna hmun venhimna leh humhalh kawnga hmalakna atan Mizoram Forest Deptt te project siam nuai Rs. 190.77 chu central sorkarin pawmsakin a thawh khat nan Rs. nuai 76.30 Mizoram sorkar hnenah pek a ni tawh a ni.