- Lalhminghlua Nkb
Tunlaiah tute emaw inti dik deuhten midang khei ranin mahni pian kum dik tak aia tlaia sawrkar kuma inziak naupangte hi kan khakin kan khei fek fek fo mai.
Hmanlai, a bikin kum 2000 hma lama matric pass ho kha chu mahni pian kum dik tak aia naupangin an sawrkar kumah an inziak tlangpui vek maithei a ni. A chhan chu anmahni khan mahni pian kum aia tlaia inziah kha a pawina pawh an hre lova rilru chhia pua inziak an ni lo deuh zel niin a lang. A tam ber chu, an vai deuh thaw khan an ni maithei, mahni thua inziak naupang pawh an ni lo, school an kal laiin an Zirtirtu/Headmaster/Principal ten nakinah sawrkar hna in la zawng duh anga tiin an inziah naupang tir zawk an ni deuh thum.
Tun hnuah miin an sawiselin an kher an kher dawn tih an hre lo. A hunlai kha chuan a pawina vak pawh a awm lo tlat bawk a ni. Thiam an chang ve letling zawk a tih theih awm e. An inziah naupan lai khan corruption, chuti khati tih sawitu awm se kan mi hmasate kha tumah an inziak naupang duh miah lo ang. Mahse a hun lai khan suala ngai tumah an awm loh avangin an hotute sawihmuhnain an inziak naupang niin a lang.
Tun hnuah tute emaw, mei nei tak leh midang kher rana mi dik inti ten hetiang em ema kan mi hmasate an sawrkar kum chungchanga archuka tui lo ang thawthanga kan chhuah thin hi chu a fuh chiah lo maithei. An hunlai dinhmun kan zuk hriatthiam pui a tul zawk em em niin a lang.
‘An kum an ziah dik loh pawn dik takin pension’ se tiin thenkhatin kan la sawi zuiin kan la chhuihzui hram. Pian kum thlak tur hian kuhva hring lei ang mai maia awlsam taka lehlan mai mai theih a ni lova, dan hremi, ukil, sawrkar etc. dawra tih kual vak ngai a nih avangin an tan hun tam tak senga buai leh kha tih na mai mai a lo ni lo bawk nen tuna thangthar kum dik taka inziakte hian rilru kan put zaupui a tul hle a ni.
Mi dik deuh rilru tluang deuh hi chu an entawn tlak fo, mahse dik inti em em midangte tawngkam-feikibara chhun mawlh mawlh thinte erawh an tawngkam chhuak hian ngaihno a bei lo fo thin. Mi dik leh mi tluang nih tum ila, midang khei rana dik intih em em erawh nih i tum lo hram ang u.
‘Think before you act, think twice before you Speak’ tih thufingte hi vawn tlat i tum hram hram ang u.