Kum tam kal tawha thil thleng mah ni se, ‘Kuch Kuch Hota Hai’ film hit taka a inlan duh loh vanga Director Karan Johar-a ngaihdamna a chan theih tawh loh thu Raveena Tandon-i’n a sawichhuak.
Bollywood romantic film kalphung thlak danglam hlawk theiha ngaih, ‘Kuch Kuch Hota Hai’ hi Karan Johar tan lemchan khawvela director hmelthar anga a invawrhchhuahna hmasa ber niin; Shah Rukh Khan, Kajol leh Rani Mukerjee te an inlan.
ANI-in a kawmnaah Raveena chuan, “Kuch Kuch Hota Hai-a ka inlan duh loh vangin tun thleng hian Karan-a’n min ngaidam thei lo. Mahse, a hun lai boruak kha a hriatchian loh vang te pawh a ni ang. Kajol kha ka elpui lian ber a ni a, film kan luhchilh rual a, a changtunu ber kan ni char char thin. Chuvang chuan, lang tlem zawk leh langsar lo zawka lan kha a ni thei lo. Rani anga role te zawk leh tlem zawka inlan tur kha a harsa. Rani kha chu newcomer a ni a, a tifuh ta a nih kha. Kha kha, khatih hun laia thil awmdan dik ta a ni a, Karan hnenah pawh chiang takin ka hrilh,” a ti.
He film hit taka inlan tur hian changtunu langsar tak tak pakua ngawt sawm ni mah se, tuma’n an lo dawngsawng duh lo nia hriat a ni a, mahni tawka boruak leh huhang ngah tak nia inhriatna avang te, small role leka inlan tur kha chuan fuhzan loha ngaiin Karan-a sawmna an hnawl fai vek a, newcomer Rani Mukerjee inlanin, a lar phah ta a ni.