- Aitea Ralte
Pa taptawm tih takah Chhinlung chhuak zaithiam ten Myanmar mipui tawrhna denchhena khawvel hla ropui zing ami, Michael Jackson leh Lionel Richie te phuah ‘We Are The World’ an cover chu tu ten emaw an phone-a an ngaihthlak lo hre fuh ve in ka’n hre tlaikhawhnu ve leh chauh pek a.
February ni 1, 2021-ah Myanmar sipai ten an ram sorkar namthluin thuneihna an pawnglak thut avangin tun thlengin pawisawilo tam takin nunna an chan tawh a, an zingah Zofate ngei pawh tam tak an tel. Zofate Inpui rawn bel pawh tam tak an awm mek.
Chhinlung chhuak zaithiam ten Myanmar mipui tawrhna tawrhpuiin, an zaithiamna te ram buai tuar te puihna atan an hlan a, ‘We Are The World’ an cover nalh ngei mai. Elena HT Par-i’n Myanmar mipui tawrhna tlangpui Saptawnga sawiin, zalenna sualtute thlawp tura sawmna tawi fel kim tak siin a sawi hmasa a, rilru a hneh nghal.
Benjamin Sum-a’n bul a rawn tan a, Lionel Richie ai mahin bul a tan nalh hial awm e. Zofa ten Stevie Wonder kan lo ngai bik lo, Benjamin Lianpi kan nei. Atea (Boomarang) leh P Thangbawi ten rawn chhunzawm zelin, Paul Simon leh Kenny Rogers te reng kan lo ngai lo.
He hla ah hian Amtea tak tak kan hmu, “James Ingram aiin a rawn bei nalh” ti ta ila, uar ka inti lemlo. Biak Hlei Par aw fit tha lutuk leh thunun nalh bawk si kha va nalh tak a ni, Billy Joel pawhin ngaithla sela “kei aiin i rawn thlawh nalh” a ti hial awm e!
Vari Varte (Vohbik) pawhin a thiam a la theihnghilh lo, Michael Jackson tlukin a thiam. Liandingpuii leh Sangtei Khuptong te pawh he hla ah hian Diana Ross leh Dionne Warwick aiin thiam ka ti zawk leh pek tlat!
Rema (Tocoda) zai ka la ngaithla tam lo, bass guitarist tha em em a ni. He hla ah hian zai lamah pawh a lo nep lo tih a rawn pholang, Bruce Springsteen emaw kan ti mai dawn alawm! Henry Varte pawhin a thiamna tak tak a pholang, Kenny Loggins aia a thiamlohna hmuh tur a awm lo. Rebecca Lallawmsangi pawh sawilan tel chakawm zing ami a ni, Steve Perry ai mahin a rawn thlawh nalh!
David Lai, Zorema Khiangte leh Zoramchhani te zai tha tak an ni, Michael Jackson, Huey Lewis, Cyndi Lauper leh Kim Carnes ten ngaithla ve ta se an dah hniam bik lo tawp ang.
G’nie, Honey Khuaitizu leh Lian Lian ten an chanpual an hneh tak, mark sang tak ka pe.
He video puitlinna tura theihtawp chhuahtu Cz Ralte, Rosie Bawitha Par, Dadeo Cer, P. Thawng Bawi, Zoramchhani, Dadeo, Atea, Gnie, Rema (Tocoda), Paul, ChinTube leh Kings & Prophet te an fakawm.
Tocoda band member te kutchhuakin Chhinlung chhuak artist te thiamna a belhchhah a, video lamah Roar media production-in beisei an phak leh pek.
“Chhinlung chhuak artist ten ‘We are the world’ an cover hi Zopa bengah chuan a original aiin a nalh” tia khaikhawm ngam a ni.
Chhinlung chhuak artist ten an sak leh atan Capt. LZ Sailo hla phuah ‘Insuihkhawm leh zai i rel ang u’ tih thlang nghal teh ang.
Chhinlung chhuak Zofa te kan lo duailo e.