Myanmar-a sumdawng pawlten thla hmasa thla tir atanga sipai sorkar an hrawn mek paih thlak tuma ram puma nawrhna an tan ni, nimin khan mi pahnih kah hlum leh an ni.
Facebook-a thlalak theh darhah chuan hmar lama Myitkyina khua khawlaia ruang pahnih let reng pawh hmuh tur a awm.
Thil thleng hmutu, sorkar duh lohna lantirnaa tel vete chuan police-in mipui hnawh darh nan stun grenade leh mittui tlakna hlova an kah thu an sawi a. Mi thenkhat erawh a bul lawk in atanga silai puakin a fuh niin an sawi bawk.
Ruang la sawntu zinga tel ve pakhat chuan thite hi an luah ve ve kah niin an thi nghal niin Reuters news agency hnenah a sawi a, mi pathumin hliam an tuar bawk.
“Rawng taka ralthuam nei lo civil mite beihna a ni,” tiin kum 20 mi tlangval chuan a sawi a. “Muanawm taka duh lohna lantir theihna dikna chanvo hi kan neih a ni,” a ti.
Nimin khan an khawpui lian ber, Yangon-ah chuan dawr, factory leh bank an khar a, hnathawk pawl 18 zetin darkar 18 awh tur nawrh an huaihawt mek a. February 1-a sipai sorkar tun din chu tawpa Aung San Suu Kyi-i sorkar din ngei an phut.
Pawl hrang hrang chuan tun hi mipui rorelna hum tura chet chhuah hun a nih thu an sawi a. heng pawl zingah hian in sak, lo neih leh thil siam chhuahna lama thawkte an tel hlawm.
“Tumahin Myanmar mite hi hna thawk turin an nawr lui thei lo. Sipai sorkar sal kan ni lo va, kan ni ngai bawk lo vang,” an ti a. Mipui rorelna an neih let leh hma chuan hna an thawk dawn lo tih an sawi bawk.