Pakistan president hlui, General Pervez Musharraf chu vui a ni ta a, a hun hnuhnungah hian mi sang tam tak an pung khawm.
Sipai chakna hmanga roreltu thin, kum 2001 atanga 2008 thleng president nihna chelh zuitu hi Pathianni khan rei tak enkawl a nih hnuah Dubai-ah a thi a, a ruang hi Pakistan-ah hawpui a ni.
A thlahna tawngtai hi Karachi-a military compound-ah neih a ni a; mahse, mi langsarte erawh an tel mang lo va, army chief leh Pakistan president pawh an tel lo.
Musharraf-a hi US-in ‘war on terror’ a kalpui laia thlawptu a nih rualin a ram chhungah erawh mi firfiak an tam hle nia ngaih a ni.
A hun tawpah hian mi 10,000 vel an tel a, a tam ber hi sipai chawl tawh leh la tang lai officer an ni tih AFP news agency chuan a tar lang.
Army officer la naupang tak chuan hruaitu hlui thlah nan leh zahna hlan nan laipui kah a ni tih a sawi.
Army chief, prime minister leh president te erawh an tel lo va; mahse, tual chhung chanchinbute chuan politician thenkhat leh army chief hlui thenkhat an tel tih an tar lang.
Tual chhung mi thenkhat chuan Musharraf-a hian a phu ang thlahna a hmu lo niin an sawi a. An zinga pakhat chuan a vuina hun hi national statium-a neih awm a nih thu AFP hnenah a sawi a. Sorkar hnathawk chawl tawh pawhin, “Vuinaah hian mi sang tam takin tel an duh a; mahse, engmah puan chian a awm tlat lo a ni,” a ti.
Musharraf-a hun hnuhnung hman zawhah hian a bula sipai thlanmual panpui a ni a, a kuang chu an ram puanzara khuh a ni a, phum a ni lai chu venhimna khauh tak hnuaiah mi tam takin an thlir a ni.
Pakistan-a thiltithei tak, sipai chuan ‘an ui tak zet thu’ an sawi a. President Arif Alvi pawhin ‘chatuana chawlh tawh turin an thlah’ tih a sawi bawk.
Pakistan-a saptawnga chhuah chanchinbu lian ber, Dawn chuan editorial-ah Musharraf-a hian hnuhma inkal thelh tak tak a hnutchhiat niin an tar lang a. 9/11 attacks hun laiin hun khirh tak a tawng a, a hmalakna chu ‘Pakistan tan kum tam tak hnuah pawh thil tha’ a nih thu an ziak.