Ecuador rama mayor atana in-candidate, inthlan hma lawka thah tak chu Puerto López khawpuia mayor atan thlan tlin a ni.
Kum 41 mi, Omar Menéndez-a hi Inrinni khan a pindanah a campaign worker-te nena an awmho lai luhchilhin mi sualin an kap hlum.
He beihnaah hian rawlthar pawh thah tel a ni a. Police chuan he pawikhawihna hi an chhui zui mek.
Menéndez-a telna party-a miin mayor atan hian a ai a awh tura ngaih a ni.
Andean ramah hian ruihhlova sumdawng pawlten tharum thawhna nasa taka an thlen laiin municipal inthlan hi neih a ni.
Menéndez-a chauh hi inthlan dawna thah a ni lo va. A hma chawlhkar hnihah khan tuipui kam khua, Salinas-a mayor atana in-candidate tho, Julio César Farachio pawh kah hlum a ni tawh.
Police chuan Farachio thattua an puh chu an man tawh a, a hmain kum 45 mi politician hi thah tumin a lo vau tawh a ni.
Tual chhung chanchinbute chuan amah hi ruihhlo tawlhruk thubuaia man a nih reng hnuah tun hnai lawk khan chhuahtir a nih thu an tar lang.
Menéndez-a thihnaah erawh tumah man an la awm lo va, a titute hi motorbike-in an tlanchhe nghal daih a ni.
President Guillermo Lasso chuan heng inthahna thlengte hi a dem thu a sawi.
Conservative banker President Lasso-a hian Ecuador-a tualthahna pung nasa lutuk chu a ngaimawhawm tak zet tih a sawi.
Ram danpui siam thatna tur pawh duangin Pathianni khan vote lak a ni nghe nghe.
Dan siam that a tum dan zingah hian Ecuadorean-te chu ram pawna pawikhawihna an nei a nih chuan thubuai an neihna rama thawn chhuah emaw, an thawn lo a nih pawhin an awm lo chunga hremna pek theih dan siam thlengin a tum.
Ecuador-ah hian tun hnaiah pawikhawihna a nasat em avangin an tan in a tawt hle hlawm a, thuneitu thenkhat chuan United States-a thubuai neite chu venhimna khauh zawka an awm theih nan thawn chhuah tha an tih thu an sawi tawh hlawm a, chu chu an tan a him bakah sum sen pawh tihtlemna tur niin an ngai.
An thenawm, Colombia pawhin hetiang deuh hian kum 1997 khan an dan siam thain drug lord hlauhawm tak takte chu US-ah an thawn zel thin.
Colombian thuneitute chuan hetianga tiha US lung ina ruihhlo lalho thiltithei tak tak tantir an nih hian anmahni vengtu leh prison director-te an tlawn lungawi mai mai thei lo va, hremna a na zawk bawk niin an sawi.
Ecuador danpui siam thatna tura rawtnate hi hnawl a ni thung a, duh lotu 51% an awm a ni.
President Lasso chuan a pawm thlap thu a sawi a, “Mipuiin thil an sawi a nih chuan keini tih tur chu an thil sawi zir chian a, hriat thiam leh pawm a ni,” tiin a sawi a ni.