Aizawl: Nimin khan Aizawl Press Club-ah thu thar thehdarhtute kawmin BJP Mizorama State Vice President R Vanramchhuanga chuan Mizoram sorkar chu ramri chin fel duh loah a puh a, ramri ching fel tura hmalakna chu mipui bumna atan chauh niin a sawi.
R Vanramchhuanga chuan Chief Minister Zoramthanga kaihhruai MNF sorkar hian Mizoram leh Assam ramri chungchangah BEFR 1875 pawm mah se, awmzia a nei tawh lo tih a sawi a. “Inner Line 1933 hi MoU-ah an pawm tih an ziak fel vek tawh a, tunah sawi danglam theih an nei tawh lo tih hi Mizo mipui hriat atan kan puang a ni,” a ti.
Assam Chief Minister Dr Himanta Biswa Sharma hian Zoramthanga sorkar dinna hi a hriat chian avangin Assam Police-te chu Mizoram chhung ngeiah, an duhna hmun hmunah camp siamin an awm chilh hmak a, Mizote lo leh huante an luah luihsak tih a sawi.
December 20, 2022 khan Assam Legislative Assembly-ah Assam CM chuan inti thei takin ‘Mizoram acre 1,800 kan laksak’ tiin a sawi a, “Mizoram home minister zahawm takin, ‘Assam sorkarin Mizoram an lak kan hre lo’ ti mah se, Kolasib leh Mamit district huam chhunga Assam Police awm tlatte khu Mizoram sorkarin a um chhuah loh chuan Mizoram leilung zau tak mai chu Assam hian min chhuhsak ngei a ni,” a ti.
Nikum November-a Mizoram leh Assam sorkar aiawhte ramri chungchanga an inbiak vawi thumnaah thuchhuah intawm an siama point pakhatnaah Mizoram sorkarin a ram chhunga rin luh an duh chin, khua leh a chhunga chengte leh sawi tur dang awm apiang thla thum chhunga buatsaih fel tura Mizoram sorkar kuta mawhphurhna a dah pawh, thla hnih ral hnuah home minister-in Boundary Committee a ko chauh a, chu committee-in study group din turin rawtna siam mah se, vawiin thleng hian sorkarin notification a la tichhuak lo tih a sawi.
Zawhna chhangin R Vanramchhuanga chuan, “MNF sorkarin ramri chin fel tuma hma a lak dan hi a lem kan ti,” tiin, ramri hi politics khelh nan leh mipui bum nan mai mai an hmang tih a lang chiang tih a sawi a. Mizoramah BJP an sorkar chuan ramri chin fel chu state pahnih chief minister-te inbiakna atangin an ching fel thei dawn tih a sawi bawk.