Aizawl: ZPM President Lalliansawta chuan politics tha siam tur leh Pathian duh ang taka leilung enkawl leh sawngbawl a nih theihna turin thinlung thianghlim leh rilru tha put a tul tih a sawi.
ZPM General Headquarters Campaign Committee buatsaihin nimin khan Vaivakawn Cultural Centre-ah ‘Training on Capacity Building & Resource Mobilization’ neih a ni a. Hun hmanpuitu Lalliansawta chuan khawvel hian enkawltu a mamawh a, chumin kawngah mihringte hi mawhphurhna neia siam an ni tih sawiin, “Pathianin min siam ang chhan taka kan nun theihna turin politics tha kan mamawh a, politics tha siam tur leh Pathian duh ang taka he leilung hi enkawl leh sawngbawl a nih theihna turin thinlung thianghlim leh rilru tha kan put a ngai a ni,” a ti.
Lalliansawta hian, ZPM in an aupui ber kalphung thar chu sorkar hun chauha hman tur ni loin, vawiin atanga hman tur a nih thu a sawi a. Sum leh pai hmachhuana campaign-te hi Pathian lawmzawng a nih loh avangin, an rinchhan Pathian duh zawngin campaign an bei dawn a, an hmahruaitu Pathian a nih phawt chuan hnehna an chang ngei dawn tih a sawi.
He hun hi K Sapdanga, Working President & Campaign Committee Chairman-in a kaihruai a ni.