Aizawl : Assam sorkar ruahmannaa Assam-Mizoram Border Festival, Abhijit Nag Mini Stadium, Katlicherra-a neih chu Kolasib Bawrhsap John LT Sanga leh Katlicherra bialtu MLA Sazum Uddin Lasker ten khuallian niin an hmanpui a, he festival-ah hian Hailakandi district leh Kolasib district-a sorkar official thenkhatin an telpui bawk.
Katlicherra bialtu MLA Sazum Uddin Lasker chuan ramri a ralmuan theih na turin Border Festival chu Kolasib district-ah pawh buatsaih ve tul a tih thu sawiin, hnam ziarang inzirtawnna leh induhsaktawnna lantirna chuan inpawhna leh inunaunna tha a hrin zel a beisei thu a sawi.
Sazum Uddin Lasker chuan vawi engemawzat Mizoram a tlawh tawh thu sawiin, Mizote chu hnam rinawm leh fel tak nia a hmuh thu a sawi a. Kolasib district atanga Border Festival chhim tura kalte lawmthu a hrilh bawk.
Kolasib Bawrhsap John LT Sanga pawhin ramri a ralmuan theih na tura sorkarin hma a lak thu leh Bawrhsap te pawh tha taka an inbiak thin thu sawiin, ramri hnaiha huan, lo, ram neite pawhin an huan te harsatna awm lova an enkawl chhunzawm chho zel nia a hriat thu a sawi a. Border Festival chuan ramria district pahnihte inkarah inpawhna tha zawk a siam ngei a beisei thu a sawi ve bawk a ni.
Assam-Mizoram Border Festival hi tumkhat buatsaihna niin, hnam ziarang pholanna hun te hman niin, Hailakandi district leh Saidan FC ten football friendly match an khel a. Assam sorkara Department hrang hrang hmalakna phochhuahna stall thahnem tak siam a ni bawk.