Aizawl : MNF Vice President Lalthlengliana chuan Minister atanga Siaha bialtu MLA Dr K Beichhua chawlh tir a nih chhan chu party duhdan ni loa MNF MDC pangate hriat lohin MADC sorkar dinglai an paihthlak vang tih a sawi.
Nimina Siaha Bazar-a MNF Siaha District Hqrs buatsaih vantlang inkhawm a hmanpuinaah thu sawiin Lalthlengliana hian, tun hnaia Siaha-a thil thleng chu mumang pawha man a nih ngaih loh thu sawiin, “Tun MNF ministry-ah minister chawlhtir a ngai hi kan duhthusam a ni loa, vanduaithlak kan ti hle,” a ti.
Lalthlengliana hian, Mara Autonomous District Council (MADC)-ah MNF MDC (9) leh INC MDC (4) te’n sorkar siama an thawho mek laiin, November 25, 2022 khan MNF MDC panga te hriat lohin Siaha bialtu MLA Dr K Beichhua, Minister, hoin party duh dan ni loin MADC sorkar paihthlak a ni chu pawi a tih thu a sawi a. Chief Minister thu anga MADC sorkar paih thla niawma an sawite chu thu belhchian dawn lo a nih thu a sawi.
MNF Vice President hian ram khat chief minister meuhin MDC pakua te chu MDC panga leh pallin va thendarh la, sorkarna va tichhe rawh a tih chu tumahin an awih a rin loh thu a sawi a. “Party thuneitu sang NCC leh PAC ten thu tawp siam tur an nih laiin ‘CM-in go ahead’ a ti tia, MNF MDC pakua-te tihphel hi party pawi sawina lian tak a ni. Thenkhat thlauh thla zawnga kal hi thil tih chi a ni ngai lo a, rem pawh kan ti lo,” tiin hremna hi lekkawh tak a nih thu a sawi bawk.
Party danga la chhuak ve ngai lo, hotu senior-te’n ngun taka ngaihtuah minister atanga chawlh tir tul an tih thu sawiin Lalthlengliana hian, “Hetiang hi MNF-ah a thleng khat khawp mai. Hrem awm chi ngawih ngawihte pawh hrem lohin an awm fo thin. Politics-ah chuan mi pakhata tluk luh thuk lutuk a tha ngai lo. A hu hoa kalpui chi a ni,” tiin, MNF atanga banna theh lut tute pawh MNF-a kir leh tur leh, Dr K Beichhua ngei pawh MNF-a kir leh se a duh thu a sawi.
Siaha Bazara public meeting V. Sangvuana, MNF District Hqrs President-in a kaihruai a ni.