Aizawl : Thupui hrang hrangah party hruaitute inzirna an buatsaih thin angin nimin khan Congress party chuan an party pisa-ah sorkar tha (good governance) chungchang an zir ho.
He hunah hian Pachhunga University College-a Economics department-a Asst. Prof Lalthlamuana Ralte-in sorkar tha chungchang zirtirin, sorkar tha nei tura mamawh hrang hrangte a sawi fiah a. “Sorkar tha loah hausak a zahthlak a, sorkar thaah retheih a zahthlak,” a ti.
Lalthlamuana Ralte hian, “Sorkar inrelbawlna tha hi suangtuahna leh mumang a ni lo. A taka tih leh thlen tir theih a ni. Sorkar tha nei tura tih tur hmasa chu inthlan kan hmachhawn danah a ni. Inthlanah danglamna a tha zawnga kan lantir a, kan thlentir chuan sorkar tha, inrelbawlna tha kan nei thei ang,” a ti.
Sorkar tha nei turin mawhphurhna la ngam hruaitu mamawh a nih thu sawiin, “Lansarh hunah ni lo, a harsat lai pawha mawhphurhna la ngam hruaitu kan mamawh,” tih sawiin, inrelbawlna tha nei turin sorkar langtlang neih a tul thu a sawi.
Lalthlamuana Ralte chuan, mipui mamawh anga zela chhuanlam siam lo a che chhuak thei hi sorkar inrelbawlna thaah chuan a awm tur a nih thu a sawi a. Duhsak leh tih bik nei lo sorkar, rualkhai taka mipui hruaitu, mitin tana luangchhluak thei leh intluktlanna sorkar mamawh a nih bakah, ram leilung, thing leh mau hausakna hman tangkai thiam a tul tiin, “Ram enkawl chungchangah Land reform kalpui thei leh kalpui ngam kan mamawh,” a ti bawk.
Eizawnna hna siam zawnga nasa zawka hmalak chu sorkar inrelbawlna tha nei turin a pawimawh a, Skill development kalpui a ngai a, thalaite an thiamna leh theihna hmanga develop an mamawh thu a sawi bawk.
He hun hi Dr. Henry Zodinliana, AIPC President-in a kaihruai a ni.