Italy-ah Juventus in an khingpui Salernitana laka an that zawkna an lantir a. Striker Dusan Vlahovic chetthat zanah 3-0 in hnehna an chang.
Thawhlehni zana Stadio Arechi-ah Serbian striker Vlahovic hian October thla hnuah a vawikhatna atan inkhel bul a tan a. Tun season-ah hliamin tibuaiin inkhelh theih loh a ngah a, hei vang hian beisei angin a che tha lo.
Minute 26-naah Hans Nicolussi chuan an penalty area chhungah Manuel Locatelli ti tlu in penalty a chawi a, Vlahovic hian an goal hmahruai ni turin a khung. Goal khung belh theihna huntha a hloh hnuah halftime dawnah Filip Kostic chuan Vlahovic goal shot per let atangin goal a khung a. Second half tan hnu lawkah Vlahovic-a’n an goal thumna a khung ve leh bawk.
Juventus manager Massimiliano Allegri chuan, “Kan team in kan inkhel hnuhnung bera kan result avangin thawhleh kan duh tih chiang takin kan ti lang. Minute 60 chhung kan kheltha hle, mahse 3-0 a nih hnu khan kan inthlahdah a, kan lamah goal shot kan neih hnem tir lutuk.”
“Kan tlankual tam tawk lova, hei hi player-ten a tha tawk lo tih an hria. Kan passing pawhin hma a sawn a ngai.” tiin an inkhel a thlirlet.