‘Basketball lalpa’ in a tum ram a thleng. NBA player ropui LeBron James chuan NBA chanchin a point score hnem ber record a siam.
Nilaini zinga Oklahoma City Thunder nen an inkhelh tumin record siam tur hian point 36 score a mamawh a. NBA legend Kareem Abdul-Jabbar-a’n point 38,387 a score chu a khum dawn. James hian point 38 score in point 36 a score naah 38,388 a tlin a, inkhel a zawhin point 38,390 a score tawh. Kum 1984, April 5 atanga ding record, mi tam takin khum theih tawh lova an ngaih a khum.
King James chu
NBA player awm tawh zinga tha ber leh ropui bera tam takin an chhal James hian he scoring record hi a siam a nih chuan hnial buai theih lohin basketball player awm tawh zingah a ber nihna a nemnghet dawn niin mi tam takin an ngai. Hei hi hnial a har tawh.
Tun season hi NBA-ah a season 20-na a ni a, kum 38 mi a ni tawh chungin season ropui a hmang.
Inhliam neuh neuh te a nei tawh a, chawlh hahdam a mamawh thin avangin a ni zawna inkhelh a thei tawh lo. Hei vang hian game 11 tun season-ah khelh loh a nei chungin game 44 a khelh atangin point 1326 a score tawh a. Abdul-Jabbar-a’n a season 20-naah point 748 chiah a score thei.
Third quarter tawp dawn lamah ‘fadeaway jumper’ hmangin a point mamawh hi James hian a score a. Inkhel hi chawlh lailawk niin lawmpuina hun hman a ni a, lawmpuitu zingah kum m75 mi ni tawh Abdul-Jabbar pawh a tel.
“Legend leh mi ropui Kareem-a hmaah, a kianga ka tel ve thei hi, ka tan chuan thil hlu leh ropui luuk a ni.” tiin James chuan a sawi.
“Tun kum 20 chuang chhunga he zinkawng ka zawhna a tel ve zawng zawng, ka inkhelhna a tel ve zawng zawngte chungah lawmthu ka sawi a. In tello chuan keimah hi ka ni lova, he dinhmun ka thlenna tur hian tha in thawh vek. In tuina leh inpekna hian he record hi min hruai thleng a ni.” tiin James chuan a sawi.
Abdul-Jabbar chuan, “He record hi khum theih a ni tih ka hria a, khum tur erawhin offense a inthlurbing player an nih a ngai ang.”
“LeBron hian a inkhelh chhung zawngin tum pakhat chiah a nei, chu chu chungnun a ni. Offense chauh a um lova, record a um lo, mahse chungnun a tum a. Hei leh chen a ber a ni thei hi fak loh theih a ni lo.” tiin James a fak.
Kum 2003 khan Akron,Ohio a seilian James hi Ohio team Cleveland Cavaliers chuan high school player a nihlaiin NBA Draft-ah no.1 ah an thlang.
Cavaliers hi NBA Finals hruai thleng mahse kum 2010 khan Miami Heat-ah a kal a. Miami-ah vawi hnih a champion hnuah Cleveland-ah kir lehin Golden State Warriors vanglaiin Cavaliers hi a champion pui a. Kum 2018 khan Los Angeles Lakers zamwin kum 2020-ah a champion pui.
NBA Finals vawi 10 khel tawh James hian kum 2011 atanga 2018 khan a khelhna team apiang Finals a hruai thleng ziah a ni.