Manager nei lo Leeds United in Manchester United lakah result duhthusam an nei teuh a, Red Devils in si hnih an phurh tawh hnuah second half-ah sut theiin inkhel hmuhnawmah 2-2 in an inhnehtawk.
Nilaini zanah Old Trafford-ah club inhmelma pahnihte an inkhel a. Ni nga chhuna vawi hnih an intawnna tura a hmasa zawkah an inkhel.
Leeds United in a tha thei ang ber a bul tanin kum 19 mi Italian rawlthar Wilfried Gnonto chuan goal hmahruai a khung nghal.
Youth coach thin Michael Skubala hnuaia inkhel Leeds in nung takin bul an tan a. United player te ball chang apiang chu hnaihchilh nghal zelin hunthawl an siamsak lo.
United in ball an inpe mumal hleithei lova, an duh anga football khelh har an ti.
Nimahsela Leeds player-te tan tlan reng theih a ni lo. Inkhel a reiin United an langsar tan a, Halftime hma in half-chance an nei nual.
Second half-ah erawh Leeds bawkin bul an tan tha. Crysencio Summerville ball pawh let chu Raphael Varane chuan an lamah a ti lut a, goal hnihin United an hniam ta zawk.
Erik ten Hag-a’n a team thlak danglamin Jadon Sancho leh Facundo Pellistri a dahlut a, Wout Weghorst leh Alejandro Garnacho a la chhuak.
Danglamna lang nghalin Diogo Dalot cross chu Marcus Rashford chuan a tauh lut a. Minute 70-naah Sancho-a’n an si phurh sutna goal a khung leh bawk.
Manchester United manager Erik ten Hag chuan bul an tan that loh chungchang a sawisel a, “First half leh second half tan khan kan inpeih lo tih a chiang a, kha kha kan tuar. Inkhel boruak sangah point kan hmu ti pawhin a sawi theih a, 2-0 atanga thawhleh hi a tha tho. Mahse khatianga bul tan kha thil pawm theih a ni lo.” tiin a sawi zui.