Africa in FIFA Club World Cup final-ah a vawi thumna atan an khawmualpui club khel tura beiseina an neih chu Real Madrid in an hmet mitb a. 4-1 in Real hian Egypt club Al Ahly chu an hneh.
Nilaini zanah Stade Prince Moulay Abdallah-ah semi-final hnuhnung zawk hi khelh a ni a. Al Ahly in nghet taka an tlarhnung an rem chu hun engemaw chen chhung ding nghet mahse halftime dawnah Vinicius Junior an dang thei lova. Brazilian forward in Real goal hmasa a khung.
Halftime zawhah Federico Valverde chuan an goal hnihna a khung ve leh nghal thuai a. Nimahsela Al Ahly hi beidawng bik lovin Eduardo Camavinga chuan an goal nawr a danna kawngah Hussein El Shahat lakah penalty a chawi a. Ali Maaloul in goal-ah a chantir.
Mahse Real Madrid an chungnung tluan thova. Minute 87-naah penalty atangin Luka Modric chuan goal khung lo mahse Rodrygo leh substitute Sergio Arribas ten huntawp hma in goal khat ve ve an khung ve leh a ni.
Inrinni zanah Real hian Saudi Arabian club Al Hilal nen final an khel ang.
Madrid coach Carlo Ancelotti chuan, “2-0 ah khan inkhel kha a zo angah kan ngai a, mahse hei hi football dan a ni lo. Kan inthlahdah avang khan kan tuar ta reng a ni.” tiin an inkhel a thlirlet.