- Mahmuaka Chhakchhuak
Khawvelah i rawn piang chhuak ve hi thinlung zawng zawngin ka lawm a, nimahsela, i hmalam hun tur ka thlir hian hei hi i hnenah ka lo sawi lawk duh a ni. Nang chuan tunah engmah ila hrethiam phak dawn siloh avangin chipchiar takin ka han hrilh che anga, vawng reng turin ka duh che.
En teh, i kianga awm, i hmuhtheih renga awm, mi tamtak zingah hian nakin lawka i hmelma la ni mai tur an awm tih hriat hmaih ngai suh la, i ṭhian ṭha anga i ngaih tamtakte hian i vanduaina ni a rawn thlenin an ṭanpui vek kher dawn lo che tih pawh hre nghal turin ka duh che a ni. A chhan chu kan chenna hi KHAWVEL a ni tlat si a ni!
I pa hian nun tamtak ka lo paltlang tawh avang hian ka sawi hi pawm la, ring tlat bawk turin ka duh a che. I ṭhenawm khawveng te lakah hmangaihna dik lantir fo la, an lakah rinngamin awm bawk ang che. I hnena lo kal apiangte chu ṭanpui an ngaihna lai apiangah ṭanpui inpeih la, hun neih hram tum la, i ṭanpui thei lo a nih pawhin lawm takin chhuah tir tum ṭhin ang che. Khawvel hi hriatthiam tum lo la, i nun chu mite hriatthiam theih turin vawng reng zawk fo ang che.
Tunge i nih in hrechiang la, i nihna bakin lan tum lo la, i nihna chu zahpui hauh bawk suh ang che. I hriatloh chu hre lo ngam la, amaherawhchu i hriatloh chu hrechiang turin zawt hreh ngai suh ang che. Mi pakhat i nih a, midang pawh mi pakhat tho anni tih hrereng la, a hmel leh incheina vangin biak ngam loh leh zah nei ngai suh ang che.
He khawvelah hia engtia rei nge i chen dawn i hriat loh avangin i nun chu uluk takin hmang la, naktuka ṭhi mai thei i nih avangin i chantuan hmun thleng thei ngei turin in bustsaih ang che. Mitin hian mahni ṭanghma haia kan buai ṭhin avangin i ṭanghma haina kawngah midang dip leh mitkham khawpa awm tum lo la, Chunglam malsawmna hi thawhrimnaah a awm tih hriat hmaih ngai suh ang che. I taksa hriselna i ngai pawimawh ang bawkin i thinlung leh thlarau hriselna leh damna tur chu ngaihtuah fo bawk la, thil ṭangkai leh i tana ṭha lo turah chuan in thiar fihlim fo ṭhin ang che.
Hmaichhana faktu leh chawimawi tu che avangin i nun chu uluk phah la, hmaichhana fak tu che chuan hnung lamah pawh a rél lo ang che tih i hriat loh avangin fimkhur takin dawngsawng fo ṭhin la, tuma rilru tina loin ṭha takin dawngsawng ṭhin la, thianah siam tum fo la, ṭhiana i siam tawh chu thlah tawh ngai suh ang che.